اكتر فيديو ربط احداث الساعه بشكل علمي رائع

ملايكه الارض ...ليه بعشقهم ؟

ببساطه لان الطفل يمثل كل الصفات الانسانيه اللي وهبها ربنا للانسان ...عالم اخر تعجز كلماتي عن وصفه.....حقيقي فيهم معاني 


غايبه ومفتقده في كتير من البالغين ......حقيقي لو فكرنا هنلاقي عندهم كتير(تفكروا  ولو لحظات هتفهمو قصدي )......ابسط حاجه 


اتعلمتها منهم كن واقعيا واحلم بالمستحيل !


حاجه تانيه : 

إذا جلست في الظلام ,, بين يدي الملك العلام
استعمل .. أخلاق الأطفال 
فالطفلُ إذا طلب شيئا ،، ولم يُعْطَه .. بكى حتى يأخُذهفكن أنت هذآ الطفل ,, و أطلب حآجتك"

مفيش واقع تاني !!

احيانا بحس اني مجبره اني امشي في طريق ما بس المشكله اني بكون مجبره اني امشي فيه حاله من اللاوعي المتعمد 

ودا بسبب انه دايما يتقال .....دا امر واقع !!!!

 ساعتها بحط شريط اسود على عينيا وبكمل يمكن لانه اتفرض عليا فلازم اكمل اويمكن فضول لنهايه الطريق 

يا ترى النهايه زي ما رسمتها ولا نهايه بشكل اخر ؟ 

بس كلمه واقع دي بقت بالنسبه ليا كابوس ببساطه لان الواقع بحلوه ومره امر مفروض عليا 

بقيت بختنق او يمكن مش عارفه اتنفس .....ببساطه احساس بالغرق !

ساعتها انفجر جوايا بركان من الغضب والثوره ...نار حسيت انها هتحرق كل شيء قصادها 

حاله من الرفض التام ...ايوه رافضاه ...ممكن يتقال في حد يرفض الواقع ؟

بس انا رافضا الواقع اللي انا عايشاه دلوقتي .

قررت ساعتها ان الواقع هيكون بمشيئه الله ثم رغبتي التامه  يعني انا اللي هقود الدفه مش لظرف ولا لراي ولا علشان حد 

واقع لونه اللي بحبه المثاليه والايمان والحب والنجاح 

غصب عن الجميع وعن ساره نفسها 

من اللحظه دي قويني يا رب اني اقرر وانفذ واني اختار واختار صح واني انجح وابعدني يا رب عن القلوب المتحجره 

وصبرني على الامراض اللي منتشره في قلوب الناس من الغل والحقد والنفاق والكذب والمكيده 

وارزقني بالقلوب الطاهره النقيه العفيفه 

وقويني على عبادتك وسامحني على تقصيري في حاجات كتير 

اللهم امين (:

من الرائع ان تكون انت القبطان والقابض على الدفه بقوه وايمان من الله .

سخــــــــــافـــــــــــــــــــــات !

من الطبيعي ان فيه سخافات كتير في حياتنا دا شيء مسلم بيه لكن اللي غريب ان احنا بقينا نخلي وجودها شيء واقعي ونتمادى فيه


يعني المفروض الحاجات السخيفه على الاقل ننكرها ولو بالقلب زي ما دينا علمنا انكار المنكر بردو احيانا بالقلب لكن :


من اللي بتعامل معاهم ياما بيغموا عينيهم عنها نوع من انواع السلبيه ياما بيعملوها بشكل من وجهه نظرهم غير ملحوظ


او في نظرهم بشكل ذكي لكن للاسف انهم اغبى من الفئه الاولى .....يمكن انا بحب اشوف كل حاجه مثاليه ودا فيه سذاجه شويه


او يمكن طيبه او يمكن لاني عشت فتره طويله تقريبا التعامل فيها على اسرتي وقليل اوي من الاصدقاء في بلد غير بلدي وبالنسبه


ليا كل يوم بحس انه اكتشاف جديد ....بصراحه انا مش هكتب قصه حياتي ولا جايه احلل موقفي ولكن انا عايزه اصارح نفسي


واصارح اللي بيقرا بيها علشان متبقاش هيا الواقع واللي بقنينا بنتعود عليه وقريب لو فضلنا على كده مش بعيد نخسر ناس كتير اوي .


هكتبهم المره الجايه .....سلام.

خليك مبسوط ....عمرو سلامه

ازيكم يا ناس كنت دخله النهارده ناويه اكتب موضوع تاني خالص الصراحه  مش عارفه ايه اللي خلاني اجيبلكم الكلمتين دول 

إلعب لعبة مالعبتهاش من و إنت صغير.

إعرق و إنهج و حس إنك عايش.

إطفي نور أودتك شغل التكييف إسمع أكثر مزيكا بتحبها و إسرح معاها.

بص لأهلك و عرفهم قد إيه بتحبهم.

بص للي تحتك و إعرف قيمة كل حاجة معاك.

بص للي فوقيك و إعرف إن رغبتك إنك تبقى زيهم هي اللي مدية طعم لحياتك.

إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك..

روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس..

في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام.

إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك.

إعرف إنك كائن مهم و في كل لحظة بتغير إتجاه التاريخ.

بص لشحات واقف جمبك.. ماتديلوش ولا نكلة.. بس سلم عليه و إضحكله و قوله “عامل إيه؟ تمام؟”

سلم على واحد صاحبك و خدوا بالحضن.. و زود مدة الحضن ثانية زيادة.. هتقوله حاجات كثير.. – بس إتأكد إن نيته مش وسخة و إنه عارف إنك “مستقيم” –

بص لبنت مغرورة و إضحك من جواك.

بص لبنت وحشة و عاكسها بنظراتك و إعرف إنها هترجع البيت مبسوطة.

بدون سبب إبعت رسالة لأي حد بتحبه قوله حاجة حلوة.

إفتح شباك العربية و إطلع على طريق سريع خلي الهوا “يطس” في وشك.. صرخ.. بس إتأكد إنك مش داخل على لجنة و إنك لوحدك و مافيش حد تعرفه في العربيات اللي حوليك.

إضربها جزمة.

خلى اللي يكره يكره و اللي يشتم يشتم وإعرف إنهم مضيعين وقتهم.

إتأكد إنك لو عارف إنك هتموت بكرة هتعمل نفس اللي بتعمله دلوقتي.

حب جامد قوي حتى لو حبك مش هيستمر لحد بليل.

كل أكلة حلوة قوي.. بس ماتخليهاش تشبعك.

إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها.

ماتشربش شيشة أو سجاير.. إشرب الهوا.. إستمتع بيه.. مش هتعرف قيمته إلا لو خلوا الهوا بفلوس.. ساعتها هتستمع بيه كأنه سيجارة حشيش مغربي.

بطل خمرة و مخدرات.. و إتعلم إزاي تستمتع بحتى أوحش الحاجات حوليك.

أكسب نفسك و حب حد بيكرهك.

إكسب نفسك ثاني و حب حد بتكرهه.

إكسب نفسك ثاني و إنسى حد لسه بتحبه من غير ما تكرهه.

إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.

إنزل شجع مع الزملكاوية لما يكسبوا.. حتى لو إنت مش زملكاوي.

إقرا الكلام ده من غير ماتعلق عليه و لو مش عاجبك بطل قراية.

شوف فيلم الكيف و ماتتفرجش على آخر ربع ساعة فيه.

إتفرج على الناظر من أول ما بيظهر محمد سعد.

لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم..

إقرا كتاب عن موضوع معقد مانتاش فاهمة و بعدها إنزل مع صحابك.. هتتبسط قوي.

جرب أكلة جديدة في مطعم فخم.. ثمنها يخرب بيتك.. و روح و إنت مبسوط.

شد مع عربية سيات.

إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار.

إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن.

إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون.

إفتكر قبل ما تنام كل الكلام الحلو اللي سمعت الناس بتقوله عنك.

كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله.

كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعلا.

شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.

فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب.

سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك.

إستحمى في نص ساعة.. خلى المية تنزل على وشك و إسمع صوتها كويس.

جيب لنفسك هدية و إستنى لحد عيد ميلادك و إديها لنفسك.

جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة.

إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.

إشرب مية كثير.

ماتغضبش مهما حصل.

أشكر كل الناس بسبب و من غير سبب.

لو حد إتريق عليك إضحك.. حتى لو من جواك بتضحك عليه.

لو حد شتمك حط ده في تانك البنزين بتاعك علشان يبقى طاقة تحركك لقدام.

لو الناس بعدت عنك إعرف لأنكم مش زي بعض.. لا هما وحشين و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم.

لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك.

بص لإمبارح.. و شوف إتعلمت منه قد إيه..

خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها..

إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح..

إسمع أغنية مدحت صالح وانا ويايا بعيش زي المليونيرات و شوفها على اليو تيوب و إضحك منها أو عليها.. بس في الحالتين هتضحك.

لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين..

إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني.

إتبسط.. و لو مش عايز تتبسط.. مش هتعرف تعكنن عليا.

لإن أنا مبسوط